T.I. en classa de lenga a Besièrs

Benedicta POUYADOUX, regenta de lenga 2011-2012

 

Lo T.I, de qu'es ?

 

Lo T.I es un dispositiu de trabalh que permet a l'enfant de trabalhar l' autonomia e la responsabilizacion.

 

L'enfant s'engatja dins un projècte de capitada en se prene en carga dins sos aprendissatges.

 

Per permetre aquela presa en carga, l'enfant a de besonh d'aisinas (afichatges,quasèrn de leiçons, fichièrs, recuèlh de mots, diccionari..)

 

Lo mot individual vòl pas dire que l'enfant trabalha sol. Apren a trabalhar sol.

Lo regent analisa lo biais de progressar de l'enfant dins lo moment de trabalh individual. Pren en compte las dificultadas rencontradas, regula en prepausar e en aconselhar d'autras pistas, d'autras aisinas...

 

Lo trabalh individual pren tot son sens dins un trabalh collectiu o dins de moments ont lo nivèl de cenchas de cada mainatge dintra dins la resolucion del problèma e dins l'avançada del projècte. Cada mainatge es investit dins un projècte en foncion de son nivèl de competéncia.

 

Las aisinas mesas a disposicion permeton a cada mainatge de se poder bastir una nocion.

 

Dins la classa de lenga, los enfants utilizan mantunes guides, plan pensats, que lor permeton d'abordar aisidament las nocions abordadas. Un somari presenta las nocions tractadas. Cada nocion es numerotada. Aquela numerotacion se tòrna trapar sul fichièr d'alenament, çò que permet a l'enfant de se mièlhs reperar dins sas aisinas.

Le guide de grammaire conjugaison cycle 3 de Frédérick Mathy present en classa balha las règlas de gramatica seguidas d'exemples. Las règlas i son claras e los exemples plan nombroses. Recampa tanben totes los temps del programa escolar declinats jos mantunes vèrbs, totjorn meteisses.

Le guide d'orthographe cycle 3 de Frédérick Mathy tòrna remembrar las règlas d'ortogràfia dels omofòns presents dins los programas escolars e las règlas d'acòrdi.

 

Segon la color de cencha, es demandat als mainatges de saupre ortografiar correctament una tièra de mots en francés e occitan.

Aquelas tièras son recampadas dins un classador e los enfants i an aisidament accés.

 

Organizacion

 

Las classas de lenga de las Calandretas Falabreguièrs e Ametlièr aculhisson los mainatges de CE1 cap al CM2 segon los oraris preconizats per La Carta de las Calandretas.

CE1 : 3 oras d'ensenhament

CE2 : 4 oras

CM1: 5 oras

CM2: 6 oras

Es possible de començar en CP tre que la cencha blanca de lectura es capitada.

 

La classa de lenga a per objectiu de confrontar las doas lengas estudiadas per las poder mièlhs comprene e utilizar.

Palancas (cf. Didier Agar, Palancas, éditions La Poesia) es una aisina plan presenta dins la classa de lenga que permet a l'enfant de se bastir un pichon referencial de ligams entre las doas lengas. Permet a l'enfant d'utilizar l'occitan, lenga ensenhada, per poder mièlhs ortografiar lo francés, lenga mairala.

 

Las nocions i son abordadas de mai d'un biais :

-De moments de sesilhas collectivas ont la nocion se bastís amassa per l'emergéncia de las representacions, la confrontacion d'idèas, l'experimentacion e la validacion o l'infirmacion de las ipotèsis.

-De sesilhas collectivas mai frontalas ont la règla es balhada pel regent.

-De sesilhas ont lo nivèl de cenchas de cadun serà mes a disposicion per un prètzfach comun (jornal de classa, projècte de classa, moments d'entre-ajuda).

-De sesilhas ont lo nivèl de cenchas de cadun permetrà de trabalhar segon sas competéncias a partir d'una produccion comuna ( mesa al ponch del tèxt, frasa clau...)

-Lo T.I ( trabalh individual) ont la nocion se bastirà en foncion de las capacitats de l'enfant a s'engatjar dins son projècte d'avançada.

Lo T.I se trabalha dins un temps plan definit dins lo planejament de la classa de lenga e se trabalha tanben a d'autres moments dins las classas.

Lo Trabalh Individual apareis clarament sul plan de trabalh. Un cèrt ritme de trabalh es demandat als mainatges per poder realizar lo contracte.

 

Avaloracion

 

Lo T.I compta fòrça dins l'avaloracion dels mainatges.

Permet de saupre se l'enfant es capable de trabalhar en autonomia, de se bastir sos aprendissatges, de se responsabilizar o se al contrari a encara de besonh d' èsser plan acompanhat e qu'a pas encara aquesit una cèrta maturitat dins l'apropriacion dels sabers.

L'avançada del trabalh en T.I dels enfants permet al regent de reperar aisidament los enfants qu'an lo mai de besonh d' acompanhament dins lor trabalh en tot pensar las aisinas que se pòdon aconselhar per ganhar en autonomia.

 

Lo T.I se compausa d'un fichièr d'alenament. Aquel fichièr recampa un vintenat de fichas, que tractan d'analisi de la lenga, de conjugason e d'ortogràfia.

Las cenchas de lectura se passan amb la referenta de la bibliotèca.

 

Per cada cencha l'enfant deu aquesir de competéncias. Los fichièrs de T.I presentan aquelas nocions jos forma d'exercicis d'estructuracion de la nocion.

 

Lo libròt de las cenchas recampa totas las competéncias d'aquesir long de l'escolaritat en primari de l'enfant.

Aquel libròt es lo libret escolar dels mainatges. Lo Livret Personnel des Compétences es tanben emplenat pel regent.

 

L'avaloracion de las avançadas se fa quand lo fichièr d'alenament es acabat o a mand de l'èsser.

L'enfant decidís de passar sa cencha quand se sentís prèst. Lo fichièr es espepissat pel regent que verifica que cada nocion avalorada siá estada abordada.

 

Un temps es servat pel passatge de la pròva. Aquel temps es pas clarament definit dins la durada. Mas cal pas que lo temps de passatge de la cencha siá tròp long . Pòt èsser un element de non validacion. La pròva es plan mai corta que l'alenament e lo fach d'acabar pas o d'aver de mal d'acabar una pròva pòt èsser signe de dificultats rencontradas per l'enfant.

 

Un temps de correccion es tanben servat. La correccion es facha pel regent qu'analisa las errors e que prepausa un temps de remediacion s'es necite. Las nocions non aquesidas son tornar trabalhadas dins de moments d'ajuda. Un enfant pòt portar ajuda o l'adulte. D'exercicis d'estructuracion de la nocion li son tornar prepausats per poder capitar lo passatge de la pròva.

 

 

 

Avis sit en òbra

L'establiment APRENE aurà lèu un sit novèl a vos prepausar.

Vos pregam de nos desencusar par qualques messatges d'error en anglés a la plaça de fòtos mancantas.

Mercés de vòstra compreneson.

A lèu doncas !