Batejada de la còla Aprene1 2015-2016

La "batejada" qu'es aquò?

 

 

Causir una personalitat occitana...

 

Lo principi ? Demandar de manlevar lo sieu nom a una femna, un òme o encara un grop, mas qualqu'un de viu. Qualqu'un que pòrta la lenga e mai l'enaura. Son los futurs regents que causisson. Presentan la demanda, cara a cara, davant los amics de la lenga occitana que se vòlon plan associar al gèst.

Alavetz s'agís de causir una personalitat del movement occitan e de li demandar de plan voler partejar lo sieu nom!

 

 

...Manlevar lo nom de qualqu'un? ... Es quicòm, aquò!

 

Per la mairina, pel pairin, que li demandan de partejar lo sieu nom, es una reconeissença de son accion en lenga nòstra. Mas, de daissar partir lo sieu nom sus las espatlas d'aqueles joves, pasmens, aquò es pas ordinari.

Es a l'encòp lor far fisança, e marcar lo passatge de las generacions. E mai la multiplicacion del singular cap al plural, tre que lo nom individual ven un nom de còla. Mòstra que la cadena que fa passar la lenga d'una generacion cap a la seguenta es pas copada. La batejada aplanta publicament que de joves vòlon persegre e perlongar la dralha dobèrta per « d' ancians ». Enfin la batejada assolida publicament que cal de mai en mai d'ensenhament EN occitan.

Aquela còla de futurs-regents de las Calandretas, que farà la demanda lo 14 de decembre, es a començar sa formacion iniciala. Demercé la batejada, se ligan entre eles a l'entorn d'un nom, e ligan lor projècte professional amb un portaire de la lenga nòstra plan famós.

 

La batejada simboliza tot aquò: la multiplicacion, lo passatge, la trasmission, l'espandi, la fisança cap als joves... Anòncia, coma la Calandreta, la prima de la lenga!

 

Serà la fèsta de la volontat tranquila del mond qu'òbran perque subrevisca e s'espandiga al pus mai aquela lenga que tant presam. Serà una fèsta modèsta dedicada a l'avenidor de la lenga.

 

 

 

Ongan, es una promocion particulara : la dels 20 ans d'APRENE,

es a dire los 20 ans d'una formacion pels regents de las escòlas Calandreta,

reconeguda per l'estat, totalament oficiala (al contrari de l'estatut de nòstra lenga) e que dubrís a un vertadièr estatut de professor de las escòlas.

S'agís donc d'un eveniment important, tant per Calandreta coma per la lenga occitana.

Li donarem lo mai de relèu possible, a Pau dins la vila bailejada pel ministre qu'a l'epòca nos permetèt de ganhar aquela aisina fondamentala.

 

La batejada nos farà partejar un moment fòrt de la lucha actuala de l'occitan per se bastir un avenidor.

 

 

D'avança, las calandrinas, los calandrins e la còla en carga d'APRENE

ne vos grandmercejan. 

 

 

 

 

 

 

 

 

 

 

 

 

 

 

Images: 
Image Alt

Avis sit en òbra

L'establiment APRENE aurà lèu un sit novèl a vos prepausar.

Vos pregam de nos desencusar par qualques messatges d'error en anglés a la plaça de fòtos mancantas.

Mercés de vòstra compreneson.

A lèu doncas !