Las nòvas d'APRENE - n°3 - genièr/febrièr de 2016

Nòvaletra de l'establiment d'ensenhament superior APRENE – n°3 – genièr e febrièr de 2016

 


 

 

Los programas novèls son ara publicats :

Programas novèls cicle 1 (mesa en aplicacion a la dintrada 2015)

Programas novèls cicles 2, 3 e 4 (mesa en aplicacion en setembre de 2016)

Val lo còp de los espepissar. Que siá per l'èime general, coma per las preconisacions, sembla que las nòstras escòlas sián de mai en mai « dins l'aire del temps »...


 

Termometre Linguistic

Es un dispositiu, e de material, fargats per la Societat Catalana de Pedagogia.

Calandreta se religuèt al projècte l'an passat : mai de 20 classas de granda seccion experimentèron aquela pròva de competéncia lingüistica.

Aqueste trabalh foguèt plan interessant ; alavetz ongan serà espandit a totes los regents de granda seccion qu'o desiran.

A la seguida, la Societat Catalana de Pedagogia, en collaboracion amb APRENE, organiza en Catalonha de jornadas de formacion al plurilingüisme a travèrs lo programa Familhas de Lengas.

Farguèron per aquò lo Marc d'Ensenyament de Llengües Vives :

http://per.espais.iec.cat/


 

Collòqui de l'ISLRF

Se tendrà los 18 e 19 de març que venon, a Perpinhan. De comunicacions, conferéncias, taulas redondas, a prepaus de la pedagogia de l'immersion. S'adreiça a totes : regents, parents, mond interessats per las lengas o la pedagogia. Mai d'entresenhas aquí.


 

Segonda jornada «Cap d'Establiment»

Dins l'encastre de la formacion continua, una segonda jornada pels caps d'establiments es organizada lo dimècres 17 de febrièr a l'Ostal d'Occitània de Montpelhièr. Serà l'escasença de rencontrar dos especialistes, lo Sénher Pèire Pietri e un collaborator.

Los regents interessats se pòdon marcar a cfpo@aprene.org abans lo 15 de febrièr.

 


 

Jornada Bailes

Se tenguèt dijòus 28 de genièr la formacion « aculhir e transmetre » dobèrta als bailes. Los bailes son un element essencial de la formacion. Aquela jornada permetèt de faire lo punt sus las aisinas per aculhir un calandrin dins sa classa. Los escambis foguèron rics. Ne traparetz qualques elements aquí.

 

 

Avis sit en òbra

L'establiment APRENE aurà lèu un sit novèl a vos prepausar.

Vos pregam de nos desencusar par qualques messatges d'error en anglés a la plaça de fòtos mancantas.

Mercés de vòstra compreneson.

A lèu doncas !